Desde hai varios séculos, reis, políticos e historiadores buscaron en balde a Biblioteca de Ouro de Iván o Terrible, que contiña manuscritos de incalculable valor, encadernados con incrustaciones de ouro e pedras preciosas, e onde se reunía todo o saber da humanidade. Aínda hoxe non se atopou. O axente da CIA Tucker Andersen é testemuña do asasinato en Washington do seu mellor amigo. Jonathan Ryder, antes de morrer, fálalle dunha avultada conta bancaria relacionada co terrorismo islámico e da Biblioteca de Ouro. Os primeiros indicios apuntan a un selecto club de bibliófilos, formado por potentados de todo o mundo, que se implicou en actividades criminais. Coa axuda de Judd Ryder, fillo do seu defunto amigo, e Eva Blake, unha restauradora que ten problemas coa Xustiza, Tucker Andersen tratará de descubrir as claves do asasinato de Ryder. Londres, Roma, Istambul ou Atenas son así etapas dunha emocionante viaxe en busca da verdade e quen sabe se dun tráxico destino.